ఇంద్రధనుస్సు ప్రతినిధి: దేశంలో ప్రతి రోజు ఎక్కడో ఒక చోట సైబర్ నేరగాళ్లు వల విసిరి డబ్బులు దోచుకోవటం గురించి వింటూనే వున్నాము. ప్రస్తుతం అలాంటి ఒక సంఘటన పటాన్చెరు పరిధిలో జరిగింది. ఇద్దరు సైబర్ కేటుగాళ్లు బెంగుళూరుకు చెందిన వృద్ధ దంపతులను బెదిరించి డిజిటల్ అరెస్ట్ పేరుతో 4.79 కోట్ల రూపాయలు దండుకున్నట్లు సమాచారం! రామచంద్రాపురం డివిజన్ కాంగ్రెస్ పార్టీ నాయకుడు ఈశ్వర్ సింగ్ తో పాటు, హైదరాబాద్ నగరంలో కిరానా షాప్ నడుపుకునే నారాయణ సింగ్ అనే వ్యక్తి కలిసి బెంగుళూరుకు చెందిన రిటైర్డ్ ఇంజనీర్ దంపతులను అధికారులమని బెదిరించి డిజిటల్ అరెస్ట్ పేరుతో వివిధ దఫాలుగా సుమారు 4.79 కోట్ల రూపాయలు కొల్లగొట్టారు. ఈ కేసులో బెంగుళూరు సౌత్ పోలీసులు హైదరాబాద్ లో ఇద్దరినీ అదుపులోకి తీసుకొని విచారించగా ఈ విషయం వెలుగులోకి వచ్చింది.
బెంగుళూరు సౌత్ ఈస్ట్ డిసిపి నేషనల్ మీడియాకు అందించిన వివరాల ప్రకారం హైదరాబాద్ కు చెందిన ఈశ్వర్ సింగ్ మరియు నారాయణ సింగ్ ఇద్దరు వ్యక్తులు బెంగుళూరుకు చెందిన మంజునాథ్ అనే రిటైర్డ్ ఇంజనీర్ దంపతులను మనీ లాండరింగ్, క్రెడిట్ బకాయిలు అని, తాము కేంద్ర ప్రభుత్వ అధికారులమని బెదిరించి, నకిలీ అరెస్ట్ వారంట్ చూపించి, వాటి నుంచి బయట పడాలంటే మాకు డబ్బులివ్వాలని సుమారుగా 4.79 కోట్ల రూపాయలు కొల్లగొట్టారు. పటాన్చెరు ప్రాంతంలో ఈ కేసు సంచలనంగా మారింది. ఒక వైపు అధికార కాంగ్రెస్ పార్టీలో వుంటూ ఈ తరహా నేరం చేయడం చూస్తుంటే ప్రజలు ఆశ్చర్యపోతున్నారు. ప్రజలందరూ ఇలాంటి మోసాల పట్ల అప్రమత్తంగా ఉండాలని పోలీసులు తెలుపుతున్నారు.